2024 чылдың октябрь 28тиң хүнүнде Антон Үержаа аттыг төп ном саңынга Тываның сураглыг чогаалчызы, алдарлыг журналист Алексей Сарыгларович Бегзин-оолдуң 75 харлаанынга тураскааткан "Челелер" деп чогаадыкчы ужуражылга болуп эрткен. Ужуражылгага Алексей Сарыгларовичиниң хеймер дуңмазы Евдокия Бегзин-ооловна Хомушку, уруу Аяна Алексеевна Бегзин-оол, керни Нина Белековна Күжүгет, чээннери Марьяна Хымыраандаевна Сарыглар база Мария Хымыраандаевна Сыдам-оол, Андрей Хымыраандаевич болгаш ооң өөнүң ишти Валентина Дажыевна Донгактар, чаңгысклассчызы Зоя Кенденовна Ооржак олар келгеннер. Байырлыг ужуражылганы эрттиреринге "Мажалык" чечен чогаал каттыжыышкыны улуг үлүг-хуузун киирген. Алексей Сарыгларовичиниң шүлуктерин сеткилдер дойлуп турар кылдыр номчаан мажалыкчылар - Аржаан Ооржак, Омак Ооржак, Чочагай Домбаанай, Сайлык Олчат-оол база Данил Хомушку.
Чалаткан аалчыларны Любовь Саая, Марта Серемел, Айлаң-кыс Ооржак, Айлаң Кара-Сал, Чойганмаа Күжүгет, Сайлык Монгуш болгаш Влад Ооржак төлептиг уткуп-хүлээп алганнар.
Алексей Сарыгларовичиниң уруу Аяна Алексеевна бистиң ном саңынга өртек чок белекти, ачазының хууда библиотеказындан тыва номнарны сөңнээн.
Ужуражылга бедик деңнелге эрткенин келген аалчылар үнелеп көрген.
"Челелер" деп чогаадыкчы ужуражылга
28 Окт.
